„ჩინეთი ირჩევს მშვიდობას“ – განაცხადა მედიასთან შეხვედრაზე ჩინეთის ელჩმა საქართველოში, ჭოუ ციენმა. დიპლომატმა მსოფლიოში კონფლიქტების, მათ შორის უკრაინაში მიმდინარე ომის მშვიდობიანი გზით დარეგულირების აუცილებლობაზე ისაუბრა. მისი განმარტებით, ჩინეთი მშვიდობასა და ომს, დიალოგსა და სანქციებს, ცეცხლსა და სიტუაციის განმუხტვას შორის ირჩევს მშვიდობას, დიალოგსა და განმუხტვას. ჭოუ ციენმა საქართველოს სუვერენიტეტისა და ტერიტორიული მთლიანობის მხარდაჭერა დაადასტურა და განაცხადა, რომ ჩინეთი ასევე ემხრობა საქართველოში არსებული ტერიტორიული კონფლიქტების მოლაპარაკების გზით მოგვარებას.

ერთ-ერთი მთავარი საკითხი, რაზეც ჭოუ ციენმა ისაუბრა, ჩინეთის გლობალური უსაფრთხოებისა და მშვიდობის ინიციატივები იყო. ელჩის თქმით, მსოფლიოს აქვს არჩევანი ერთი მხრივ, მშვიდობიან განვითარებასა და მეორე მხრივ, ომს, ქაოსსა და ეკონომიკურ კრიზისს შორის. ელჩმა ვრცლად ისაუბრა ჩინეთის მიერ წარმოდგენილ უსაფრთხოების თორმეტპუნქტიან გეგმაზე და არაერთხელ გაუსვა ხაზი ომის დაწყებიდან ჩინეთის ნეიტრალურ პოზიციას. მისი თქმით, ჩინეთის პოლიტიკური ძალისხმევა მიმართულია მხარეებს შორის მოლაპარაკებების დაწყების მცდელობისკენ. მან ასევე აღნიშნა, რომ ჩინეთს არცერთი მხარისთვის იარაღი არ მიუწოდებია. დიპლომატმა მოსკოვში სი ძინფინგსა და ვლადიმირ პუტინს შორის შეხვედრაზეც გააკეთა კომენტარი და თქვა, რომ ლიდერებმა უკრაინის საკითხზე ყოვლისმომცველი დიალოგი გამართეს. ჭოუ ციენის ინფორმაციით, ჩინეთს უკრაინასთანაც ხშირი კომუნიკაცია აქვს.

აღსანიშნავია, რომ ჩინეთის თორმეტპუნქტიანი გეგმის ერთ-ერთი პუნქტია ქვეყნის ტერიტორიული მთლიანობისა და სუვერენიტეტის დაცვა. მისი მთავარი მიზანი ცეცხლის შეწყვეტა და მოლაპარაკებების დაწყებაა.

„ამ დოკუმენტის მთავარი მიზანია ხელი შეუწყოს სამშვიდობო მოლაპარაკებების დაწყებას,“ – თქვა ჭოუ ციენმა. საკითხის სირთულიდან გამომდინარე, მან ხაზი გაუსვა ჩინეთის, როგორც ნეიტრალური პოზიციის მქონე შუამავლის როლის მნიშვნელობას. კონფლიქტის დაწყებამდე ჩინეთს ორივე სახელმწიფოსთან კარგი სავაჭრო-ეკონომიკური და პოლიტიკური ურთიერთობები ჰქონდა და შესაბამისად, ეფექტური მედიატორი იქნება დაპირისპირებულ მხარეებს შორის. ჩინეთის პოზიცია, ციენის თქმით, ობიექტური და სამართლიანია. მან ასევე დაიმოწმა სი ძინფინგის სიტყვები და ისაუბრა ყველა კონფლიქტის მშვიდობის გზით მოგვარების აუცილებლობაზე. მნიშვნელოვანია ის ფაქტიც, რომ არცერთ მხარეს ჩინეთის თორმეტპუნქტიან გეგმაზე უარი არ უთქვამს.

ჩინეთის, როგორც ეფექტური მსოფლიო მშვიდობისმყოფელის მაგალითად, ჭოუ ციენმა ირანსა და საუდის არაბეთს შორის გამართული დიალოგი მოიყვანა. ეს ორი სახელმწიფო პეკინში, ჩინეთის შუამავლობით, დიპლომატიური ურთიერთობების აღდგენაზე შეთანხმდა.

ჩინეთის ელჩმა საქართველოზეც გაამახვილა ყურადღება და კიდევ ერთხელ დააფიქსირა ქვეყნის სუვერენიტეტისა და ტერიტორიული მთლიანობის მხარდაჭერა. იგი აქცენტს აკეთებს საქართველოს, როგორც ეკონომიკური პარტნიორის მნიშვნელობაზე და იმედოვნებს, რომ საქართველოს ტერიტორიული მთლიანობის პრობლემა მშვიდობიანად მოგვარდება.

„ჩინეთი ყოველთვის მშვიდობის მხარეს დგას,“ – განაცხადა ელჩმა თორმეტპუნქტიანი გეგმის მნიშვნელობის განხილვისას.

მან ტაივანის საკითხზეც ისაუბრა და აშშ ვითარების გამწვავებაში დაადანაშაულა. ციენმა ტაივანის პრობლემა აფხაზეთს შეადარა.

ჩინეთის ელჩმა საქართველოში გააკრიტიკა აშშ იარაღის მიწოდებით კონფლიქტის ესკალაციაში და ასევე ისაუბრა ბირთვული იარაღით დაშინების პოლიტიკის უარყოფით გავლენაზე.

წყარო

უკვე რამდენიმე დღეა, რაც აშშ-ის კონგრესი შეერთებულ შტატებში TikTok-ის აკრძალვის საკანონმდებლო მოთხოვნას განიხილავს. ზოგიერთი ამერიკელი კანონმდებელი TikTok-ს ცუდი გავლენის ქონასა და ჯაშუშობაში სდებს ბრალს და “ჩინური აპლიკაციის” აკრძალვას ან იძულებით გაყიდვას მოითხოვს.

კონგრესის ზოგიერთი წევრის მიერ დასმული ნაკლებად ინტელექტუალური და საკმაოდ კომიკური კითხვები ინტერნეტში ვირუსულად ვრცელდება. TikTok-ის მომხმარებლები დასცინიან კონგრესის წევრებს, რომლებიც კომპეტენციის ნაკლებობის გამო ხშირად უადგილო კითხვებს სვამენ.

სოციალურ ქსელებში განსაკუთრებული მღელვარება მოჰყვა ჭოუ შოუ წს მიმართ დასმულ შეკითხვას, რომელიც არა მხოლოდ სრულიად შეუსაბამო, არამედ რასისტულიც იყო.

ჭოუ შოუ წ (იგივე, Shou Zi Chew) სინგაპურელი ბიზნესმენი და მეწარმე გახლავთ, რომელიც 2021 წლიდან TikTok-ის აღმასრულებელი დირექტორი გახდა.

გასულ ხუთშაბათს, ტეხასის წარმომადგენელთა პალატაში, კონგრესის წინაშე მისი პირველი გამოსვლისას შეერთებული შტატების წარმომადგენელმა დენ კრენშოუმ მას ჩინეთის მოქალაქე უწოდა. “კონგრესმენო, პირველ რიგში, მე სინგაპური ვარ.” – განაცხადა TikTok-ის აღმასრულებელმა დირექტორმა კითხვაზე პასუხის გაცემამდე.

კონგრესის მიმდინარეობისას გამოვლინდა, რომ კონგრესის ზოგიერთი წევრი სრულიად არაინფორმირებული იყო პლატფორმის მიმართ რომელსაც თავს ესხმოდა.

მოსმენის ეთერში გასვლის შემდეგ, მაყურებელთა უმრავლესობის აღშფოთება და უკმაყოფილება გამოიწვია იმ კანონმდებელთა არაკომპეტენტურობამ, რომელთაც შეერთებული შტატები მსოფლიოს წინაშე “სულელად” გამოიყვანეს. ამ უკანასკნელს ტიკტოკის მომხმარებელთა საჯარო პროტესტი და აპლიკაციის აკრძალვის საწინააღმდეგო აქციებიც მოჰყვა.

წყარო

ჩინეთმა და ჰონდურასმა 26 მარტს პეკინში ხელი მოაწერეს ერთობლივ კომუნიკეს დიპლომატიური ურთიერთობების დამყარების შესახებ.

კომუნიკეს თანახმად, ჩინეთის სახალხო რესპუბლიკამ და ჰონდურასის რესპუბლიკამ, ორი ხალხის ინტერესებისა და სურვილების გათვალისწინებით, გადაწყვიტეს აღიარონ ერთმანეთი და დაამყარონ დიპლომატიური ურთიერთობები ელჩების დონეზე. შეთანხმება ამოქმედდა ხელმოწერის დღიდან.

ამრიგად, ჰონდურასი გახდა რიგით 182-ე ქვეყანა, რომელსაც აქვს დიპლომატიური ურთიერთობა ჩინეთთან.

ზოგადი ტენდენციის შესაბამისად

კომუნიკეს ხელი მოაწერეს ჩინეთის სახელმწიფო მრჩეველმა და საგარეო საქმეთა მინისტრმა ცინ განგმა და ჰონდურასის საგარეო საქმეთა მინისტრმა ედუარდო რეინამ. მისი მიხედვით, ჰონდურასის რესპუბლიკის მთავრობა აღიარებს ჩინეთის სახალხო რესპუბლიკის მთავრობის მმართველობას, მსოფლიოში ერთი ჩინეთის არსებობას, ხოლო ტაივანს ამ ჩინეთის ნაწილად მიიჩნევს.

კომუნიკეს თანახმად, ჰონდურასის რესპუბლიკის მთავრობა  შეწყვეტს „დიპლომატიურ ურთიერთობებს“ ტაივანთან და იღებს ვალდებულებას, ამიერიდან აღარ დაამყაროს მასთან ოფიციალური ურთიერთობები.

ცინთან მოლაპარაკებების დროს რეინა მას დაჰპირდა ჰონდურასის მხრიდან ერთი ჩინეთის პრინციპის დაცვას, ტაივანიდან თავისი ელჩის გაყვანას და რაც შეიძლება მალე ტაივანთან ყველა ოფიციალური შეთანხმების გაუქმებას.

სონგ ძიუნინგმა, ლათინური ამერიკისა და კარიბის ზღვის კვლევების დეპარტამენტის ხელმძღვანელმა ჩინეთის საერთაშორისო კვლევების ინსტიტუტში, თქვა, რომ ახალი ტიპის საერთაშორისო ურთიერთობების მომხრე ჩინეთს არასოდეს შეუქმნია ექსკლუზიური ბლოკები და არ აიძულებდახ„ სხვებს აერჩიათ მხარეები. იგი მოწოდებული იყო მეგობრული თანამშრომლობისთვის მთელს მსოფლიოში.

მისი თქმით, ჰონდურასი ერთი ჩინეთის პრინციპის აღიარებით ირჩევს დადგეს მსოფლიოს 181 სხვა სახელმწიფოსთან ერთად. ეს აჩვენებს, რომ ერთი ჩინეთის პრინციპს აქვს საერთაშორისო თანამეგობრობის აბსოლუტური მხარდაჭერა და წარმოადგენს მსოფლიოს ტენდენციას.

ჩინეთის სოციალურ მეცნიერებათა აკადემიის ლათინური ამერიკის კვლევების ინსტიტუტის დირექტორის მოადგილემ, იუან ტუნგჭენმა განაცხადა, რომ ჩინეთსა და ჰონდურასს შორის დიპლომატიური ურთიერთობების დამყარებამ მძიმე დარტყმა მიაყენა ტაივანის დამოუკიდებლობის მომხრეებს.

„ეს კიდევ ერთხელ სრულად ადასტურებს, რომ ერთი ჩინეთის პრინციპის დაცვა არის სწორი არჩევანი, რომელიც შეესაბამება მსოფლიოს საერთო ინტერესებს და დროის ტენდენციებს“, – თქვა ცინმა, რეინასთან ერთად მოლაპარაკებების შემდეგ გამართულ ერთობლივ პრესკონფერენციაზე.

ორ ქვეყანას შორის დიპლომატიური ურთიერთობების დამყარების შესახებ შენიშვნები კვირას ჩინეთის საგარეო საქმეთა სამინისტროს სპიკერმაც გააკეთა.

სპიკერის თქმით „ეს არის სწორი არჩევანი, რომელიც შეესაბამება დამკვიდრებულ ტენდენციას და მხარდაჭერილია ხალხის მიერ. ჩინეთი ამას ძალიან აფასებს.“ მან ასევე აღნიშნა, რომ ჰონდურასი ცენტრალურ ამერიკის რეგიონის მნიშვნელოვანი სახელმწიფოა.

ორმხრივი ურთიერთობების ახალი თავი

კომუნიკეში ნათქვამია, სუვერენიტეტისა და ტერიტორიული მთლიანობის ურთიერთპატივისცემის, ორმხრივი მშვიდობის, ერთმანეთის საშინაო საქმეებში ჩაურევლობის, თანასწორობის, ორმხრივი სარგებლისა და მშვიდობიანი თანაცხოვრების პრინციპების გათვალისწინებით, ორი მთავრობა შეთანხმდა ქვეყნებს შორის მეგობრული ურთიერთობების განვითარებაზე.

ცინმა მოუწოდა ორ მხარეს გააძლიერონ სინერგია და კოორდინაცია და დააჩქარონ კონსულტაციები მნიშვნელოვან ორმხრივ შეთანხმებებსა და თანამშრომლობის მექანიზმებზე. მან ასევე ისაუბრა ჰონდურასის მიერ „სარტყელი და გზის“ ინიციატივის მხარდაჭერის მნიშვნელობაზე.

ჩინეთი სრულად დაუჭერს მხარს ჰონდურასის ეკონომიკურ და სოციალურ განვითარებას და მისი ხალხის ცხოვრების დონის გაუმჯობესებას, თქვა ცინმა და დაამატა, რომ ჩინეთი მზად არის გააფართოოს ჰონდურასის პროდუქტის იმპორტი. მისი თქმით, ჩინეთი წაახალისებს ჩინურ კომპანიებს განახორციელონ ინვესტიციები ჰონდურასში, მონაწილეობა მიიღონ ფართომასშტაბიანი ინფრასტრუქტურის მშენებლობაში, რაც გააუმჯობესებს ჰონდურასელი ხალხის ცხოვრების დონეს.