განათლება და საზოგადოება

განათლებას ჩინეთში მრავალსაუკუნოვანი ისტორია აქვს. დაწყებული კონფუცის პერიოდიდან დღემდე, ჩინელი ხალხი დიდ ყურადღებას აქცევს განათლებას და მიიჩნევს, რომ ის წარმატების მიღწევის ერთი-ერთი საუკეთესო გზაა.

ბოლო რამდენიმე ათეული წლის განმავლობაში ჩინეთში მრავალი ახალი რეფორმა ჩატარდა, გაიზარდა ინვესტიციები განათლების მიმართულებით, შედეგად, საერთაშორისო კვლევებში ჩინელი სტუდენტები უფრო და უფრო მაღალ შედეგებს აჩვენებენ.

მოსწავლეთა შეფასების საერთაშორისო პროგრამა PISA-ს კვლევების მიხედვით, რომელიც მათემატიკაში, მეცნიერებასა და წიგნიერებაში ჩატარებულ ტესტებს ეფუძნება, 2015-2016 წლებში ჩინელი მოსწავლეები მსოფლიოში მოწინავე პოზიციებს იკავებენ (ჩინეთის სპეციალური ადმინისტრაციული რეგიონის, ჰონგკონგის, მოსწავლეები მსოფლიოში მე-2 ადგილზე, ხოლო მატერიკული ჩინეთის მოსწავლეები მე-10 ადგილზე გავიდნენ).

ასეთი შედეგების მიღწევა ბევრ შრომას მოითხოვს. საშუალოდ, ჩინურ სკოლებში სწავლა დილის 7:30 საათზე იწყება და საღამოს 5 საათზე მთავრდება; სასწავლო წელიწადი კი სექტემბრის დასაწყისიდან ივლისის შუა რიცხვებამდე გრძელდება.

გარდა სასკოლო გაკვეთილებისა, მოსწავლეები სკოლის შემდეგ რეპეტიტორებთანაც ემზადებიან. უმთავრესი მიზანი „კაოქაოს“ – უნივერსიტეტში მისაღები გამოცდების， ჩაბარება და პრესტიჟულ უნივერსიტეტში მოხვედრაა. 2019 წელს 10 მილიონზე მეტმა სტუდენტმა მიიღო მონაწილეობა „კაოქაოში“; ჩინური, მათემატიკა და უცხო ენა ყველა სტუდენტისთვის სავალდებულო გამოცდებია; ამას გარდა, სტუდენტები ვალდებულები არიან აირჩიონ ორიდან ერთ-ერთი მოდული: თავისუფალი მეცნიერებები (პოლიტიკა, ისტორია, გეოგრაფია) ან ზუსტი და საბუნებისმეტყველო მეცნიერებები (ფიზიკა, ქიმია, ბიოლოგია). გამოცდები 2 დღეს გრძელდება და სტუდენტებისგან დიდ ენერგიასა და მობილიზებას მოითხოვს.