[:ka]
ჩინეთში ტექნოლოგიები დიდი სისწრაფით ვითარდება, კომპანიები ცდილობენ მოკლე დროში მაქსიმალური კომფორტი შესთავაზონ კლიენტებს. მათ შორის, ერთ–ერთი ახალი ხერხია თანხის გადახდა კომპიუტერის მიერ სახის სკანირებით, თუმცა ეს ჯერჯერობით არც ისე გავრცელებული საშუალებაა.
ამჟამად, ჩინეთში თანხის გადახდის სამი ყველაზე გავრცელებული საშუალება არსებობს: ნაღდი ფულით ანგარიშსწორება, საბანკო ბარათით გადახდა ან მობილური აპლიკაციის საშუალებით გადარიცხვა. ეს უკანასკნელი გადახდის ყველაზე მოსახერხებელი საშუალებაა. თითქმის ყველა მაღაზიასა თუ კაფეში მიმაგრებულია სპეციალური QR კოდი, რომლის საშუალებით შესაძლებელია ანგარიშის მოძებნა და თანხის გადარიცხვა. ამისთვის მობილური ინტერნეტია საჭირო.
WeChat და Alipay არის ორი ყველაზე პოპულარული აპლიკაცია თანხის გადასარიცხად.
WeChat (ჩინ. 微信 ვეისინი) არის Tencent–ის (ჩინ. 腾讯 თენგსუნი) ცნობილი კომპანიის მიერ შექმნილი სოციალური ქსელი, რომელსაც ძალიან ბევრი მომხმარებელი ჰყავს და ერთ–ერთი ძირითადი საკომუნიკაციო საშუალებაა. 2013 წლის აგვისტოში WeChat-ის მომხმარებლებს შემქმნელებმა ახალი საკმაოდ მოსახერხებელი ფუნქცია შესთავაზეს _ საბანკო ბარათის გამოყენების გარეშე სოციალური ქსელიდან მობილურის საშუალებით თანხის გადარიცხვა. 2014 წლის მარტიდან კი უკვე კომპანიებს შეეძლოთ დარეგისტრირება და კლიენტებისათვის ანგარიშსწორების ამ საშუალების შეთავაზება. WeChat–ის მეშვეობით გადახდა სულ უფრო მიმზიდველი ხდება. მათ არამხოლოდ ქვეყნის შიგნით, არამედ საზღვარეთაც შეუძლიათ თანხის გადარიცხვა.
Alipay–ის (ჩინურად ჭ’ფვუპაო) კოპანია “ალიბაბა ჯგუფმა” დააარსა 2004 წელს და მომხმარებელს გადახდის ახალ მეთოდებს სთავაზობდა. სწორედ მისი წყალობით ადამიანებმა უფრო აქტიურად დაიწყეს ინტერნეტ-მაღაზიებში პროდუქტების შესყიდვა. მიუხედავად იმისა, რომ WeChat–ის სახით სერიოზული კონკურენტი გამოჩნდა ბაზარზე, Alilpay დღესაც საკმაოდ დიდი მოწონებით სარგებლობს. მისი გამოყენების ფუნქციებიც, WeChat-ის მსგავსად, არის QR კოდის შემოწმებით ანგარიშის პოვნა ან საკუთარი QR კოდის ჩვენება თანხის გადასარიცხად.
ამ მობილური აპლიკაციების უპირატესობა ისიც არის, რომ მათი საშუალებით შესაძლებელია კინოთეატრის, მატარებლის ან თვითმფრინავის ბილეთების შეძენა, ტაქსის გამოძახება და ა.შ. რეგისტრაციისთვის საკმარისია ჩინეთის ბანკის ბარათი და მობილურის ნომერი იყოს დარეგისტრირებული. როდესაც აპლიკაცია შეძლებს მობილური ნომრისა და ბანკის ბარათის ერთმანეთთან დაკავშირებას, თანხის გადარიცხვაც შესაძლებელი იქნება.
[:]
