[:ka]
21 აპრილს, კახა ბენდუქიძის საუნივერსიტეტო კამპუსში გაიმართა თავისუფალი უნივერსიტეტის კონფუცის ინსტიტუტის კონკურსების “რა ვიცით ჩინეთის შესახებ?” და “ჩემი თვალით დანახული ჩინეთის” დაჯილდოების ცერემონია. კახა ბენდუქიძის კვირეულის ფარგლებში ჩატარებულ ღონისძიებას ესწრებოდნენ ჩინეთის სახალხო რესპუბლიკის საგანგებო და სრულუფლებიანი ელჩი საქართველოში, ბატონი ძი იენჩი, თავისუფალი და აგრარული უნივერსიტეტების რექტორი ბატონი ვატო ლეჟავა, თავისუფალი უნივერსიტეტის კონფუცის ინსტიტუტის დირექტორები ქართული და ჩინური მხრიდან, სკოლების დირექტორები და წარმომადგენლები, მონაწილე მოსწავლეები და სტუდენტები.
.
დაჯილდოების ცერემონიამდე ჩინეთის ელჩმა და რექტორმა სიტყვით მიმართეს აუდიტორიას. ჩინეთის ელჩმა, ბატონმა ძი იენჩიმ თავისუფალი უნივერსიტეტის კონფუცის ინსტიტუტს დაარსების 8 წლისთავი მიულოცა და მადლობა გადაუხადა კონკურსების ორგანიზებისათვის, ჩინური ენისა და კულტურის სწავლების მხრივ აქტიური მუშაობისათვის. ასევე აღნიშნა, რომ თავისუფალი უნივერსიტეტი ჩინური ენის ცოდნის მხრივ მაღალი დონით გამოირჩევა. ელჩმა მადლობა გადაუხადა სკოლის მოსწავლეებსა და სკოლების წარმომადგენლებს მონაწილეობისათვის და ჩინეთით დაინტერესებისათვის. მან აღნიშნა, რომ“ერთი სარტყელი, ერთი გზის” ინიციატივის განხორციელებისათვის საქართველოსა და ჩინეთს აუცილებლად სჭირდება ბევრი ჩინური ენის მცოდნე ადამიანი.
ბატონმა ვატო ლეჟავამ მადლობა გადაუხადა ჩინეთის სახალხო რესპუბლიკის საელჩოს მხარდაჭერისათვის და კონფუცის ინსტიტუტს მიულოცა დაარსებიდან 8 წლის შესრულება. ასევე მადლობა გადაუხადა კონფუცის ინსტიტუტს გაწეული შრომისა და მონდომებისათვის.
სასკოლო კონკურსი “რა ვიცით ჩინეთის შესახებ?” წელს მეხუთედ ჩატარდა. მისი მიზანი იყო, მოსწავლეებს ჩინეთის შესახებ ცოდნა გამოევლინათ. რიგით მესამე ესეების კონკურსში “ჩემი თვალით დანახული ჩინეთი” სტუდენტებსა და მოსწავლეებს ქართულ ენაზე უნდა გაეზიარებინათ საკუთარი დამოკიდებულება შორეული და საინტერესო ქვეყნისადმი. წარმატებული მონაწილეები და სკოლები დაჯილდოვდნენ საჩუქრებით, სერტიფიკატებითა და მადლობის სიგელებით.
[:]
