[:ka]თბილისში ფორუმი “21-ე საუკუნის ჩინეთი” გაიმართა[:]

[:ka]

ოთხშაბათს, 24 ოქტომბერს სასტუმრო თბილისი მარიოტში ქართულ – ჩინური მედია პლატფორმა სინომედიის ორგანიზებით გაიმართა ფორუმი „21- ე საუკუნის ჩინეთი“. 

ფორუმის მთავარ თემას წარმოადგენდა “ჩინეთი ჩემ ცნობიერებაში”, ღონისძიების მიზანი ჩინეთში მიღებული გამოცდილების ერთმანეთისთვის გაზიარება და მომავალში საქართველო-ჩინეთის მრავამხრივი თანამშრომლობის გზების განხილვა იყო.

საღამო მისასალმებელი სიტყვით გახსნეს სინომედიის დამფუძნებელმა ანა გოგუაძემ და ფორუმის სპიკერმა, საქართველოს სინოლოგთა ასოციაციის პრეზიდენტმა, მარინე ჯიბლაძემ. მათ მადლობა გადაუხადეს დარბაზში მყოფ საზოგადოებას ფორუმში მონაწილეობისთვის და კიდევ ერთხელ გაუსვეს ხაზი ღონისძიების მიზანს. 

ფორუმის მთავარი თემიდან და მიზნიდან გამომდინარე საღამო დისკუსიის ფორმით წარიმართა. მომხსენებლები საზოგადოების წინაშე პრეზენტაციით წარსდგნენ, ისაუბრეს შთაბეჭდილებებზე და ჩინეთში მიღებულ გამოცდილებაზე. სტუმართა შორის იმყოფებოდნენ სხვადასხვა სექტორის წარმომადგენლები. სახელმწიფო მოხელეები, სინოლოგები, მედიის წარმომადგენლები და ჩინეთში სახელმწიფო დაფინანსებით მყოფი სტუდენტები. ღონისძიებას ასევე ესწრებოდა ფორუმის საპატიო სტუმარი ჩინეთის საგანგებო და სრულუფლებიანი ელჩი საქართველოში, ძი იენჩი და საელჩოს სხვა წარმომადგენლები.

დისკუსია იყო მრავალმხრივი და საინტერესო, ვინაიდან სპიკერებმა ისაუბრეს ისეთ სფეროებზე, როგორიცაა ტურიზმი, ჟურნალისტიკა, განათლება, გარემოს დაცვა, თანამედროვე ჩინეთის ახალი სახე, მრავალმხრივი შესაძლებლობები, ეკონომიკა და ჩინეთ – საქართველოს ურთიერთობები. 

ღონისძიების დასასრულს, შემაჯამებელი სიტყვა ჩინეთის ელჩმა, ძი იენჩიმ წარმოთქვა. მან შესავალში მოკლედ ისაუბრა საკუთარ მოღვაწეობაზე საქართველოში. ხაზი გაუსვა იმ საერთო ღირებულებებს რომელიც ორ ქვეყანას ერთმანეთთან აკავშირებს. კიდევ ერთხელ აღნიშნა „სარტყელი და გზის“ პროექტის მნიშვნელობა ურთიერთობების გამყარებაში და დასძინა, რომ ჩინეთ – საქართველოს ურთიერთობები საკმაოდ წარმატებულად მიიწევს წინ, რაზეც მეტყველებს ფაქტები, თუმცა დრო არის ის მნიშვნელოვანი რამ რაც უნდა გამოვიყენოთ დაჩქარებისთვის. 

მან დამსწრე საზოგადოებას ჩინეთ – საქართველოს დამეგობრებული ქალაქები გააცნო, როგორიცაა: სინძიანი და კახეთი, ბათუმი და ურუმჩი, შანტუნგი და ბათუმი, გარდა ამისა დამეგობრებულია კახეთი და ხაინანი, თბილისი და კუანგჭოუ. 

ჩინეთის ელჩმა სიტყვის დასასრულს სამომავლო გეგმებზე ისაუბრა და აღნიშნა, რომ მსგავსი სახის ღონისძიებები კიდევ უფრო შეუწყობს ხელს კულტურათა გაცვლას ორ ქვეყანას შორის. მან მადლობა გადაუხადა სინომედიას აღნიშნული ფორუმის ორგანიზებისთვის და უსურვა წარმატებები. 

[:]