[:ka]
2 ოქტომბერს იმპაქტ ჰაბში საქართველოს პოლიტიკის ინსტიტუტის ანალიტიკოსის – ჯოზეფ ლარსენის – პოლიტიკის დოკუმენტის “საქართველო – ჩინეთის ურთიერთობები: “სარტყელისა და გზის” გეოპოლიტიკა” პრეზენტაცია გაიმართა.
GIP-ის ახალ პოლიტიკის დოკუმენტში საქართველოსა და ჩინეთს შორის ორმხრივი ურთიერთობებია განხილული. მასში ასევე წარმოდგენილია ინფორმაცია „სარტყელისა და გზის“ ინიციატივის შესახებ. დასკვნის სახით, პოლიტიკის დოკუმენტში საქართველოს მთავრობისთვის წარმოდგენილია რეკომენდაციები „სარტყელისა და გზის“ ინიციატივის ფარგლებში ჩინეთთან ურთიერთობისას მაქსიმალური სარგებლის მისაღებად.
ქვეყანაში არსებული სტაბილური გარემო, ღრმა და ყოვლისმომცველი თავისუფალი სავაჭრო სივრცის შესახებ შეთანხმება ევროკავშირთან და ჩინეთთან, უკრაინასა და თურქეთთან გაუმჯობესებული ინფრასტრუქტურული კავშირები და ხელსაყრელი გეოგრაფიული მდებარეობა „სარტყელისა და გზის“ ინიციატივში საქართველოს მნიშვნელოვან მოთამაშედ აქცევს.
ჯოზეფ ლარსენმა პრეზენტაციისას ხაზი გაუსვა საქართველოსთვის ჩინეთის მნიშვნელობას და აღნიშნა: „თუ საქართველოში რუსული ძალების ესკალაცია გაგრძელდება, ჩინეთს პოტენციურად შეეძლება მისი შეკავება, რუსეთში ან ევრაზიის ეკონომიკური კავშირის წევრ სხვა ქვეყნებში ინვესტიციებისა და ვაჭრობის შემცირება-გამკაცრების მუქარის გზით. ეს მხოლოდ და მხოლოდ მოვლენების განვითარების შესაძლო სცენარია, თუმცა ყურადსაღები.“
GIP-ის ახალი პოლიტიკის დოკუმენტის პრეზენტაციას ესწრებოდნენ სხვადასხვა რანგის წარმომადგენლები, რომელთა შორის იყვნენ ჩინეთის სახალხო რესპუბლიკის საგანგებო და სრულუფლებიანი ელჩი საქართველოში ძი იანჩი, კონფუცის ინსტიტუტის დირექტორი მარინე ჯიბლაძე, ამერიკის საელჩოს წარმომადგენლები, ჟურნალისტები და ჩინეთ-საქართველოს ურთიერთობებით დაინტერესებული სხვა პირები.
[:]
