[:ka]
საპარტნიორო ფონდი ჩინეთის ბაზარზე ქართული წარმოების ღვინის ექსპორტის გაზრდის მიზნით, ადგილობრივ ღვინის მწარმოებელ კომპანიებს საქპატენტში შეხვდა.
საპარტნიორო ფონდი მზადყოფნას გამოთქვამს დაეხმაროს ქართული ღვინის მწარმოებლებს, ჩინეთის მაღალ სეგმენტში შეიტანონ პროდუქცია და სარგებელი მიიღონ.
შეხვედრაზე საპარტნიორო ფონდის აღმასრულებელმა დირექტორმა დავით საგანელიძემ ქართველ მეღვინეებს ქართული ღვინის ჩინეთის სახალხო რესპუბლიკაში გატანისა და რეალიზაციაში დახმარების შესახებ ინიციატივა გააცნო.
„ჩინეთი ქართული ღვინისთვის საინტერესო ბაზარია. უნდა აღინიშნოს, რომ გასულ წელს ჩინეთში 5 000 000 ბოთლი ქართული ღვინო გაიყიდა. თუმცა ამ ქვეყანაში მეტი პოტენციალია, ისევე, როგორც საქართველოს აქვს პოტენციალი გაიტანოს ექსპორტზე უფრო მეტი ქართული ღვინო ვიდრე აქამდე. ჩვენი ჩინელი პარტნიორების მხრიდან ქართული ღვინის დაგემოვნების შემდეგ გაჩნდა დიდი ინტერესი ქართული პროდუქტის ჩინეთში გატანის და მათი მხრიდან გამოითქვა სურვილი სწორედ საპარტნიორო ფონდი გამხდარიყო შუამავალი და გარანტორი ადგილობრივ მწარმოებლებთან ურთიერთობისას“ – განაცხადა საპარტნიორო ფონდის აღმასრულებელმა დირექტორმა დავით საგანელიძემ.
საპარტნიორო ფონდის შეთავაზების დეტალებთან დაკავშირებით პრეზენტაცია ქართველ მეღვინეებთან ფონდის საინვესტიციო დეპარტამენტის წარმომადგენელმა ნინო ჩოლოყაშვილმა გააკეთა. ღვინის მწარმოებლებს სიტყვით მიმართა საქპატენტის თავმჯდომარემ ნიკა გოგილაძემ და სასაქონლო ნიშნების დაცვასთან დაკავშირებით მათ დამატებითი ინფორმაცია მიაწოდა.
საქართველოს სოფლის მეურნეობის სამინისტროს და ღვინის ეროვნული სააგენტოს მხარდაჭერით, ასევე, საპარტნიორო ფონდის ჩართულობით აქტიურად ხდება ჩინეთის სხვადასხვა პროვინციაში ქართული ღვინის პოპულარიზაცია. ჩინეთის სახალხო რეპუბლიკაში უკვე გახსნილია რამდენიმე ათეული ქართული ღვინის მაღაზია, სალონი, პავილიონი, სახლი, ცენტრი, რესტორანი და სხვა.
ჩინეთის სახალხო რესპუბლიკის სხვადასხვა პროვინციაში 100-ზე მეტი ქართული კულტურისა და ღვინის სახლები გაიხსნა და ფუნქციონირებს, სადაც ქართული ღვინის პოპულარიზაცია და რეალიზაცია ინტენსიურად ხდება.
[:]
