[:ka]
პრემიერ მინისტრ გიორგი კვირიკაშვილსა და წამყვანი ჩინური ბიზნესკომპანიების წარმომადგენლებს შორის შეხვედრა გაიმართა. როგორც იუწყება, მთავრობის ადმინისტრაცია, შეხვედრაზე მხარეებმა საქართველოს საინვესტიციო პოტენციალი და თანამშრომლობის პერსპექტივებზე ისაუბრეს.
შეხვედრაზე კიდევ ერთხელ გაესვა ხაზი ჩინეთის მნიშვნელობას ჩვენი ქვეყნისათვის. აღინიშნა, რომ ჩინეთი საქართველოს ერთ-ერთი ყველაზე მნიშვნელოვანი ეკონომიკური პარტნიორი და უმსხვილესი ინვესტორია, რომელთანაც ახლახანს გაფორმებული, თავისუფალი ვაჭრობის შესახებ შეთანხმება გვაკავშირებს.
პრემიერ-მინისტრის განცხადებით, საქართველო გახდა ქვეყანა, რომელსაც ყველაზე ლიბერალური ორმხრივი ეკონომიკური ურთიერთობა აქვს ჩინეთთან ამ რეგიონში.
„ორიოდე კვირის წინ ხელი მოვაწერეთ ჩინეთთან თავისუფალ სავაჭრო შეთანხმებას, რაც არის წინგადადგმული ნაბიჯი ჩვენ ორმხრივ ურთიერთობებში. საქართველო გახდა ქვეყანა, რომელსაც ყველაზე ლიბერალური ორმხრივი ეკონომიკური ურთიერთობა აქვს ჩინეთთან ამ რეგიონში. მინდა იცოდეთ, რომ საქართველო ღიაა ჩინური ინვესტიციებისთვის“, – განაცხადა პრემიერმა შეხვედრაზე.
შეხვედრაზე ხაზი გაესვა ჩინური კომპანიების მხრიდან საქართველოთი დაინტერესების მზარდ დინამიკას.
აღნიშნული შეხვედა მთავრობის ადმინისტრაციაში გაიმართა. ცნობილია, ისიც, რომ შეხვედრას საქართველოს ეკონომიკისა და მდგრადი განვითარების მინისტრი გიორგი გახარია და ”საპარტნიორო ფონდის” აღმასრულებელი დირექტორის მოადგილე ნათია თურნავა დაესწრნენ.
[:]
