[:ka]
სიას შემდგომ იყო შანგის დინასტია, რომელიც თარიღდება ძვ.წ. 1600 – ძვ.წ. 1046 წლებით. შანგის იმპერია არის პირველი ჩინური სახელმწიფო წარმონაქმნი, რომლის არსებობაც დასტურდება არა მხოლოდ არქეოლოგიური მასალებით, არამედ ზეპირი და წერილობით წყაროებითაც. ამ დინასტიის ნაშთები გვაძლევს ჩინური დამწერლობის ყველაზე ადრინდელ და სრულყოფილ ნიმუშებს, რომლებიც შესრულებულია კუს ბაკანსა და ცხოველების ძვლებზე.
შანგის დინასტიის დროს გახშირებული იყო მონებით ვაჭრობა, რადგან მმართველი კლასი მონათმფლობელებისგან შედგებოდა. ვასალებს შეეძლოთ მიწების გარკვეული ნაწილი ემართათ, თუმცა სანაცვლოდ მეფისთვის ხარკის გადახდა და ომის დროს ჯარისკაცების გამოყვანა ევალებოდათ.
შანგის ხალხს სჯეროდა ადამიანების მსხვერპლთშეწირვის და მონებს ხშირად სწორედ ამისთვის იყენებდნენ. თუ მეფე მოკვდებოდა, ას მონაზე მეტი შეუერთდებოდა მას სამარხში. ზოგიერთებს ჯერ თავს აჭრიდნენ და შემდეგ სამარხში ყრიდნენ, ზოგს კი პირდაპირ ცოცხლად მარხავდნენ. მსხვერპლთშეწირვას მიმართავდნენ ასევე სხვადასხვა რიტუალებისა და ცერემონიების დროს.
ამ დინასტიას ჰქონდა საკმაოდ უცნაური პატრილინიარული სისტემა, იმის მაგივრად რომ მამას შვილისთვის დაეტოვებინა ტახტი, მეფის წოდება გადადიოდა უფროსი ძმიდან უმცროსზე. ხოლო იმ შემთხვევებში, თუ ყველაზე უმცროსი ძმა გარდაიცვლებოდა, მაშინ ტახტზე ადიოდა ასაკით ყველაზე დიდი ბიძაშვილი ან მამიდაშვილი, რომელიც აუცილებლად მამრობითი სქესის უნდა ყოფილიყო.
გათხრების შედეგად ნაპოვნია იეროგლიფური წარწერები კუს ბაკანსა და ცხოველის ძვლებზე, აგრეთვე ბრინჯაოზე, ნეფრიტზე, კერამიკასა და ქვის ნაწარმზე. დიდი აღმოჩენები გაკეთდა შანგის დინასტიის დედაქალაქის – ინის ტერიტორიაზე (თანამედროვე ქ. ანიანგი), რომელიც თანამედროვე ხენანის პროვინციაში მდებარეობს. უძველესი ქალაქი შედის იუნესკოს მსოფლიო მემკვიდრეობის ნუსხაში.
[:]
