[:ka]სოფლის მეურნეობის სამინისტროს სამეცნიერო-კვლევითი ცენტრისა და კომპანიის „ხუნანი“ სოფლის მეურნეობის ჯგუფის ერთობლივი მასშტაბური პროექტის „სასათბურე ბოსტნეულის წარმოება“ ფარგლებში, ქართველი ფერმერები გადამზადებას ჩინეთის რესპუბლიკის ხუნანის პროვინციაში გადიან.
პროექტის ფარგლებში, ერთთვიან ტრენინგში 30 ქართველი ფერმერი და დაინტერესებული პირია ჩართული. ამის შესახებ, ქართულ მედიას სოფლის მეურნეობის სამინისტრომ აცნობა. ტრენინგის ფარგლებში, უცხოელი მეგობრები გაგვიზიარებენ გამოცდილებას ისეთ საკითხებში, როგორიცაა ბოსტნეული კულტურების მოვლა-მოყვანა-შენახვის თანამედროვე ტექნოლოგიები, ბოსტნეულის გადამუშავება, ტრანსპორტირება და მარკეტინგის საკითხები, ასევე, მავნებელ-დაავადებათა წინააღმდეგ ბრძოლის ღონისძიებები, მზის სათბურების მშენებლობის სპეციფიკა და მართვის საკითხები.
პროექტის ფარგლებში, მონაწილეებმა ჩინეთის რესპუბლიკის რამდენიმე პროვინციაში ბოსტნეული კულტურის წარმოების კომპანიები და მათი ბაზები დაათვალიერეს; პრაქტიკული, საველე სწავლების დროს ქართველი ფერმერები სათბურებსა და სადემონსტრაციო ნაკვეთებზე მიმდინარე კვლევებსაც გაეცნენ. აღსანიშნავია, ის ფაქტიც , რომ ჩინეთის რესპუბლიკაში ქარველი ფერემერების უკვე მეორე ჯგუფი გადის სასწავლო კურსს. პირველ ეტაპზე, ამავე პროექტის ფარგლებში, 23 კაცი გადამზადდა. პროექტის ფარგლებში ქართველი ფერემერების ჩინეთში გადამზადება მომავალშიც იგეგმება.
აღნიშნული პროექტი, ჩინეთის სახალხო რესპუბლიკის ვაჭრობის სამინისტროს ფინანსური მხარდაჭერით ხორციელდება. კომპანიის „ხუნანი“ სოფლის მეურნეობის ჯგუფის მხარდაჭერით, საქართველოშიც გამართა ტრენინგები ბოსტნეული კულტურების მოვლა-მოყვანის ტექნოლოგიებზე, რომლის ფარგლებშიც 400-მდე ფერმერი გადამზადდა.[:]
