[:ka]
ჩინეთის ნიადაგური საფარი დიდი მრავალფეროვნებით ხასიათდება. აქ წარმოდგენილია ყველა სახის ნიადაგი, რომელიც გავრცელებულია აზიის კონტინენტზე. რელიეფის, კლიმატისა და ნიადაგების მრავალფეროვნებამ საკმაოდ ხელსაყრელი პირობები შექმნა სხვადასხვა მცენარეულობის განვითარებისთვის: დაწყებული ტროპიკებით, დამთავრებული ტაიგის ფლორით ჩრდილოეთში. ტყეები ქვეყანაში ცოტაა. მათ მთელი ქვეყნის ტერიტორიის მხოლოდ 12 % უკავიათ. ტყეების გავრცელების ძირითადი რაიონებია დიდი და მცირე ხინგანები, ასევე ტროპიკული ზონა. ჩინეთის ტერიტორიაზე ფლორის 35 000-მდე სხვადასხვა წარმომადგენელია. აქ ვხვდებით ჩრდილოეთ ნახევარსფეროსათვის დამახასიათებელ თითქმის ყველა სახის მცენარეს. მცენარეული საფარის მრავალფეროვნება უპირველესად განპირობებულია სამხრეთ-აღმოსავლეთ აზიის მეზობლობით და მათ შორის რაიმე ბუნებრივი საზღვრის არარსებობით.
ქვეყნის ტერიტორიაზე გამოიყოფა 4 ძირითადი ბუნებრივ-მცენარეული ზონა:
- სტეპის მცენარეული ზონა
- მარადმწვანე სუბტროპიკული და ტროპიკული ტყეების ზონა
- ზომიერი ფოთოლმცვენი ტყეების ზონა
- უდაბნოს მცენარეულობა
მცენარეულობის ტიპებით სიმდიდრემ და რელიეფის ნაირსახეობამ ხელი შეუწყო მრავალფეროვანი ცხოველთა სამყაროს განვითარებას და გადარჩენის შესაძლებლობა მისცა ცხოველთა ისეთ ჯიშებს, რომლებიც სხვაგან აღარ გვხვდება. ასეთ უიშვიათეს ცხოველთაგან აღსანიშნავია იანძის დიდი დინგნიჩაბასებრი, პატარა ალიგატორის ჯიშები აღმოსავლეთ და ცენტრალურ ჩინეთში და დიდი სალამანდრა დასავლეთში. ჩინეთის სამხრეთ პროვინციებში კი უმეტესწილად გვხვდება რეპტილიების, ამფიბიების, ფრინველებისა და ძუძუმწოვრების ტროპიკული ტიპები. ცხოველთა სამყაროს მრავალფეროვნებით განსაკუთრებით გამოირჩევა ტიბეტი და ს’ჩუანი. მათ შორის ეს უკანასკნელი ცნობილია, როგორც გიგანტური პანდების სამშობლო. ჩინეთის მთებში შევხვდებით ასევე ტაკინს, ხოხბების სხვადასხვა ჯიშებსა და შაშვების ნაირსახეობას. იშვიათი ცხოველების სიას ასევე მიეკუთვნებიან ოქროსფერი მაიმუნი, თეთრტუჩა ირემი, მდინარის დელფინი, იანძის ნიანგი, წითელი ციყვი და მონაცრისფრო ლეოპარდი.
[:]
კომენტარის დატოვება
კომენტარის დასატოვებლად უნდა გაიაროთ ავტორიზაცია.