ჩინეთში საავადმყოფო გამოჯანმრთელების შემდეგ კიდევ 72 ადამიანმა დატოვა. ჩინეთის ჯანდაცვის ორგანოს განცხადებით ამ დროისთვის კორონავირუსისგან სულ 243 პაციენტია გამოჯანმრთელებული და ისინი საავადმყოფოებიდან უკვე გაწერეს.
ჯანდაცვის ეროვნული კომისიის რეკომენდაციით საავადმყოფოებიდან პაციენტების გაწერა ხდება იმ შემთხვევაში, როდესაც კორონავირუსის სიმპტომები შემსუბუქებულია, სხეულის ტემპერატურა მინიმუმ სამი დღის განმავლობაში ნორმალურ დიაპაზონში რჩება, ხოლო ნუკლეინის მჟავების ტესტი ორჯერ უარყოფით შედეგს აჩვენებს.
ახალი მონაცემებით კორონავირუსით სულ დაღუპულია 259 ადამიანი, ჩინეთის ჯანდაცვის კომისიის ინფორმაციით, ვირუსის 2,102 ახალი შემთხვევა გამოვლინდა, რაც იმას ნიშნავს, რომ საერთო ჯამში, ქვეყანაში კორონავირუსით დაინფიცირებულთა რაოდენობამ 11,791-ს მიაღწია.
