[:ka]
პეკინში სამი წლის წინ ჩამოვედი, ჩემი პირველი ჩინური გამოცდილებაც პეკინს უკავშირდება. მას შემდეგ ბევრ ქალაქს ვესტუმრე, მაგრამ პეკინი მაინც ჩემს საყვარელ ადგილად რჩება, ყველა დანარჩენი ან ზედმეტად განვითარებულია ან ზედმეტად ვიწრო მიმართულების. პეკინი სახლური ადგილია. აქ ყველაფერია, ჩქარია, კეთილია… მიყვარს ძველი ხუთონგების (ჩინური ტრადიციული სახლები), იმპერატორის სასახლე, ბიზნეს ცენტრები, პატარა დამალული ჯაზ ბარები, უცნაური შენობები და კიდევ უფრო უცნაური წესები.
იუ და სანი ჩემი სამსახურის მახლობლად გავიცანი, როდესაც თავისი კაფე ტრისმოკა (Trismoka) გახსნეს. დიდი შვება იყო მახლობლად გემრიელი ყავის დალევა, აქამდე მხოლოდ ჩინური საცხობები და რესტორნები იყო გარშემო. როცა იქ მივდივარ, თუ ბევრი ხალხი არ არის ვსაუბრობთ ხოლმე. იუ და სანი მოგზაურობის მოყვარულები არიან, კაფეში ეკრანზე აუცილებლად ნახავთ მათი მოგზაურობის სურათებს სხვადასხვა ტურისტული დანიშნულების ადგილებში. გასაოცარი ფოტოსურათებია.
თანამედროვე აპლიკაციების გამო სულ მგონია, რომ ეფექტი ადევს და ყოველ ჯერზე ვეკითხები ნამდვილია თუ არა ეს სურათითქო. ფული დააგროვეს, იმოგზაურეს და შემდეგ თავისი მულტიკულტურული კაფეც გახსნეს, თბილი გარემოთი და გემრიელი კერძებით. ერთხელ ვკითხე ტრისმოკა რატომ დაარქვითქო, მიპასუხა გრძელი ამბავიაო. მაინც არ შევეშვები, ძალიან მაინტერესებს ამ მყუდრო ადგილის სახელის ისტორია. როცა ყავას ვუკვეთავ იუ თავის გამომცხვარ ორცხობილას მჩუქნის ხოლმე და მეუბნება დღეს გავაკეთეო. დღეს ჩინეთში შუა შემოდგომის ფესტივალის აღსანიშნად ორი ნამცხვარი მაჩუქა, ერთს ქოქოსის შიგთავსი ჰქონდა, მეორეს კი კვერცხის გულის. ამ ფესტივალს მთელი ჩინეთი აღნიშნავს და ერთ თვით ადრე სადღესასწაულო მთვარის ნამცხვრების გამოცხობა და გაყიდვა იწყება. მერე ოქტომბრის პირველი კვირა დასვენებად ცხადდება და ყველა ამ დროს თავის ოჯახთან ერთად ატარებს. ამ პერიოდში ჩინელები მშობლებს თავიანთ ქალაქებსა და პროვინციებში სტუმრობენ. დაახლოებით ისე აღინიშნება ეს დღესასწაული, როგორც ჩვენთან აღდგომა. ხანდახან როცა მეჩქარება და ლანჩ – ბოქსი თან არ მაქვს იუს მივწერ ხოლმე Wechat – ით ქათამი კარის სოუსში თუ გაქვსთქო და ისიც მახვედრებს. მიყვარს ჩინეთი და განსაკუთრებით პეკინი, სახლურია და კეთილი…
[:]
