,მიუხედავად იმისა, რომ საჩუქარი ნებისმიერისთვის სასიხარულო საგანთან ასოცირდება, ჩინურ კულტურაში არსებობს საჩუქრების რამდენიმე ტიპი, რომელთა ჩუქებაც, კულტურული ტაბუსა თუ გავრცელებული ცრურწმენების გამო, შეუსაბამოდ ითვლება. მაგალითად:
მწვანე ქუდი
მის ჩუქებას სიმბოლური დატვირთვა აქვს, რადგან ძველ ჩინეთში მწვანე ფერი დამცირებასთან ასოცირდებოდა და დროთა განმავლობაში ღალატის მნიშვნელობაც შეიძინა.
მსხალი
ჩინეთში ხილით სავსე კალათა პოპულარულ საჩუქრად ითვლება, თუმცა მასში იშვიათად თუ შეხვდებით მსხალს. ამის მიზეზი ისაა, რომ იგი მიტოვებასთან და განცალკევებასთან ასოცირდება.
საათი ან ქრიზანთემები
მათი ჩუქება სიკვდილს უკავშირდება.
ფეხსაცმელი
მიუხედავად იმისა, რომ ზოგადად ჩინელებს ძალიან მოსწონთ წყვილი ნივთების საჩუქრად მიღება, ფეხსაცმელი გამონაკლისია. იგი ზუსტად ისე გამოითქმის, როგორც ბოროტება. ვინმესთვის ფეხსაცმლის ჩუქება ნიშნავს, რომ გსურთ ამ ადამიანმა თქვენგან თავი შორს დაიჭიროს.
ქოლგა, მაკრატელი, დანა ან მსგავსი ტიპის ბასრი საგანი
ურთიერთობის დასასრულთან, დაშორებასთან ასოცირდება.
სარკე
როგორც ჩანს, სარკის გატეხის მიერ მოტანილი უიღბლობის ცრურწმენა არა მხოლოდ საქართველოში, არამედ ჩინეთშიცაა გავრცელებული. ასევე, მიიჩნევა, რომ სარკე მოჩვენებებს იზიდავს.
ნაჭრის ცხვირსახოცი
ჩინეთში მოძველებულ საჩუქრად ითვლება, რადგან მხოლოდ დეკორატიული ფუნქციით an პანაშვიდების დროს თუ იყენებენ.
წიგნი
ჩინურად წიგნი და წაგება ერთნაირად გამოითქმის შესაბამისად. წიგნის ჩუქება წაგებასთან ასოცირდება.
„4“ – 四 = 死
როგორც ცნობილია, ჩინეთში ახალი წლის დღესასწაულზე წითელი კონვერტით ფულის ჩუქებაა გავრცელებული, თუმცა თანხის რაოდენობა არ უნდა უკავშირდებოდეს საკრალურ „სიკვდილის ციფრ“ ოთხიანს.
ამასთან, როდესაც საქმე საჩუქრის შეფუთვაზე მიდგება, უმჯობესია, თავი ავარიდოთ შავი ან თეთრი ფერის შესაფუთი მასალის გამოყენებას, რადგან თეთრი დაკრძალვასთან, ხოლო შავი ამპარტავნებასთან ასოცირდება. ასევე, ჩინეთში საჩუქრის ორივე ხელით გადაცემისა და გამორთმევის ჩვეულებაა გავრცელებული.
რასაკვირველია, აუცილებელია საჩუქრის გარემოების მიხედვით შერჩევა. მაგალითად, თუ ჩინურ ოჯახში აპირებთ სტუმრად მისვლას ან საქმიან შეხვედრაზე მიდიხართ საჩუქრის ჩუქება, კეთილგანწყობის გამოხატვის არაჩვეულებრივი ხერხია. შედარებით ხანშიშესულთათვის ვიტამინების ან მედიკამენტების ჩუქება საკმაოდ თავაზიანი ჟესტია. თუ ისეთ ადამიანებს ხვდებით, რომელთა ხედვასა და გემოვნებას ნაკლებად იცნობთ, ხილით სავსე კალათა საუკეთესო გამოსავალია. ბავშვებისთვის – სათამაშოების, ხოლო ქალბატონებისთვის, პარფიუმერიის ჩუქება მშვენიერი აზრია. რაც შეეხება ბიზნეს შეხვედრას, ამ დროს კალმის (თუმცა არა წითლის, რადგან კრიმინალთან ან სიკვდილთან ასოცირდება), თქვენი ქვეყნიდან ჩატანილი სუვენირის ან ტკბილეულის, თამბაქოს ან ალკოჰოლური სასმლის (მაშინაც კი თუ საჩუქრის მიმღები არ ეწევა ან არ სვამს) ჩუქება მიზანშეწონილია.
