სულ რამდენიმე დღის წინ ჭადრაკის მსოფლიო ჩემპიონატი (World Chess Championship 2023) ჩინეთის წარმომადგენლის ტინგ ლიჟენის ჩემპიონობით დასრულდა. ტინგი მე-17 მსოფლიო ჩემპიონი და მსოფლიო ჭადრაკის ყველაზე განხილვადი ფიგურა გახდა.
იან ნეპომნიახჩიმ და ტინგ ლიჟენმა ბოლო წლების ერთ-ერთი ყველაზე საინტერესო მატჩი გამართეს. ნერვიულობის ფონზე ზოგიერთ თამაშში ორივე მოთამაშემ არაერთი შეცდომა დაუშვა, თუმცა აუცილებლად უნდა აღინიშნოს, რომ ორივე დიდოსტატმა უკომპრომისოდ იბრძოლა გამარჯვებისთვის და შესანიშნავად წარმოაჩინა თავი.
ტინგი მატჩის უმეტესი ნაწილის განმავლობაში ჩამორჩებოდა მეტოქეს, თუმცა თამაშის ბოლოს, გადამწყვეტ მომენტში, უპირობო ლიდერობა მოიპოვა. ამაღელვებელი play-off-ის ვიდეო სოციალურ სივრცეში დიდი პოპულარობით სარგებლობს და ამ დროისთვის 200 000-ზე მეტი ნახვა აქვს.
უნდა აღინიშნოს, რომ ერთ-ერთი პირველი, ვინც ტინგს გამარჯვება მიულოცა მისი წინამორბედი მსოფლიო ჩემპიონი მაგნუს კარლსენი გახლდათ.
ტინგ ლიჟენი სამშობლოდან დიდ მხარდაჭერას გრძნობდა, თუმცა მისი მეტოქე იან ნეპომნიახტჩის შემთხვევა საპირისპირო იყო. ჭადრაკის მსოფლიო ჩემპიონობის ტიტული რუსეთს ხელში ათწლეულების განმავლობაში ეპყრა, ვიდრე ვლადიმირ კრამნიკი მას 2007 წელის ჩემპიონატზე არ დაკარგავდა. ერთის მხრივ, რუსეთში ჭადრაკის გულშემატკივრები იმედოვნებდნენ, რომ იან ნეპომნიახჩი საბოლოოდ დაუბრუნებდა რუსეთს პირვანდელ დიდებას, თუმცა მეორეს მხრივ, ნეპომნიახჩის ფიგურა სამშობლოში მაინცდამაინც დიდი სიყვარულითა და პატივისცემით არ სარგებლობდა, რადგან თავიდანვე აკრიტიკებდა რუსეთის აგრესიულ ომს უკრაინის წინააღმდეგ. არ გამორიცხავენ, რომ შესაძლოა სწორედ მხარდაჭერის ნაკლებობ ამიმოქმედა ნეპომნიახტჩიზე უარყოფითად.
ტინგს მთელი მისი ოჯახი გულშემატკივრობდა, მისი განსაკუთრებული ქომაგი კი დედა იყო. მხარდამჭერებს შორის გახლდათ სიე ძუნიც (Xie Jun), რომელიც 1991 წელს პირველი ქალი ჩინელი მსოფლიო ჩემპიონი გახდა.
ტინგმა მთელ ჩინეთს უდიდესი სიხარული მოუტანა, თუმცა ნაცვლად იმისა, რომ იზეიმოს ახალი ჩემპიონატისთვის ემზადება. ახალ მსოფლიო ჩემპიონს დასვენებისთვის დიდი დრო სულაც არ აქვს, რადგან ამ შაბათ-კვირას ბუქარესტში Grand Chess Tour-ში მიიღებს მონაწილეობას, რომელიც Superbet Chess Classic-ით დაიწყება. გავრცელებული ინფორმაციით, Grand Chess Tour-ის ერთ-ერთი მონაწილე იან ნეპომნიახტჩიც იქნება. ვინ იცის შესაძლოა მეტოქეებმა ერთი და იმავე თვითმფრინავითაც კი იმოგზაურონ ახალი ასპარეზობის დასაწყებად.
