ჩინური ახალი წლის ზეიმი დასასრულს უახლოვდება, რაც ნიშნავს რომ ჩინეთში ფარნების ფესტივალი (ჩინ. 元宵节 / yuánxiāo jié) აღინიშნება.
ფარნების ფესტივალი მთვარის კალენდრის პირველი თვის მე-15 დღეს (ამ წლის 5 თებერვალს) აღინიშნება. იგი ითვლება ხანგრძლივი სადღესასწაულო პერიოდის გრანდიოზულ დასასრულად. ფარნების ფესტივალი აღნიშნავს წლის პირველ სავსემთვარეობას – აქედან მოდის მისი სახელიც (იუანი ნიშნავს დასაწყისს, სიაო ნიშნავს ღამეს).
ფესტივალი აღნიშნავს ზამთრის დასრულებას და გაზაფხულის სეზონის დაწყებას. ის ხშირად 24 ტრადიციული ჩინური მზის პერიოდიდან ორს – „გაზაფხულის დაწყებას“ და „გაზაფხულის წვიმას“ ემთხვევა.
ამ დღეს, ხალხი ანთებს ფარნებს, რაც სიბნელის განდევნის და იმედის სიმბოლოა. ისინი ასევე ესწრებიან სპექტაკლებს, ფეიერვერკების შოუს და ცდილობენ ამოხსნან გამოცანები. გადმოცემის თანახმად, ტრადიცია განსაკუთრებით პოპულარული ხანის დინასტიის პერიოდში გახდა.
ძველად, ფარნების ფესტივალი წელიწადის ერთ-ერთი იშვიათი დრო იყო, როდესაც დაუქორწინებელ გოგონებსა და ბიჭებს ერთმანეთთან შეხვედრის უფლებას აძლევდნენ, ამიტომ ზოგიერთი მას ჩინურ ვალენტინობის დღესაც უწოდებს. ეს რომანტიკული ფესტივალი კარგად არის აღწერილი ჩინურ ლიტერატურაში და უამრავი ცნობილი პოემის ინსპირაციაც გამხდარა.
ტრადიციები
ფარნების ფესტივალი მთელი მსოფლიოს მასშტაბით აღინიშნება უამრავი განსხვავებული ტრადიციით. მაგალითად, ზოგიერთ ქალაქში, ფესტივალის აღსანიშნად გრანდიოზულ გამოფენებსა და პარადებს აწყობენ.
ჩინეთის ფუძიანის პროვინციაში, ფუთიენში, მიიჩნევენ, რომ მათთან ფარნების ფესტივალი ყველაზე ხანგრძლივი პერიოდია. ზოგიერთი ადამიანი, მას ახალი წლის დღესასწაულზე მნიშვნელოვნად მიიჩნევს.
დღესასწაული თითქმის სამი კვირა გრძელდება და მოიცავს პარადს, ცეცხლის ორმოზე ხტომას, მუსიკასა და ტრადიციული თეატრის სპექტაკლებს.
ხუპეის ქალაქ ნუანციუენში, მაცხოვრებლები ისვრიან „ფეიერვერკს“ – გამდნარ რკინას ასხამენ ქალაქის ცივ კედელს ნაპერწკლების შესაქმნელად. ეს მრავალსაუკუნოვანი ჩვეულება, დაშუხუა ან თიეხუა (ითარგმნება როგორც ხის ყვავილი ან რკინის ყვავილი) ჩინეთის მთავრობამ არამატერიალურ კულტურულ მემკვიდრეობად აღიარა. ეს იყო ასევე ერთ-ერთი მთავარი წარმოდგენა პეკინის ზამთრის ოლიმპიური თამაშების გახსნის ცერემონიაზე 2022 წელს.
თაივანში ეს დღესაწაული საკმაოდ მასშტაბური და ექსტრემალურია. მისი ერთ-ერთი ღონისძიება ცნობილია, როგორც ფუტკრის სკის ფეიერვერკების ფესტივალი. ღონისძიება ყოველწლიურად იმართება ქალაქ იანშუიში, სადაც ათასობით ადამიანი ჩაფხუტითა და ცეცხლგამძლე ტანსაცმლით ვიწრო ქუჩებში ამზადებს ფეიერვერკით სავსე სკის ფორმის გამშვებებს. ისინი ისვრიან ასობით და ათასობით რაკეტას სხვადასხვა მიმართულებით, რის შედეგადაც წარმოიქმნება დრამატული და ხშირად შემზარავი სცენა.
