[:ka]ეკონომიკა: ტენგ სიაოფინგი – დიდი რეფორმატორი[:]

[:ka]

ტენგ სიაოფინგი (საქართველოში ცნობილი, როგორც დენ სიაოფინი)  ჩინეთის ეკონომიკის ისტორიისათვის ერთ-ერთი საკვანძო პიროვნებაა, რომელმაც ჩინეთში ეკონომიკურ პროცესებს შეუცვალა მიმართულება და ამით ქვეყნის მომავალიც შეცვალა. დღეს მას დიდი რეფორმატორის სახელითაც მოიხსენიებენ ხოლმე.

XX საუკუნის 70-იანი წლების მეორე ნახევარში  ტენგ სიაოფინგმა   გახსნილობის მნიშვნელოვანი რეფორმის წამოიწყო ეკონომიკაში. აღნიშნული რეფორმის შემადგენელი ნაწილი იყო 4 განსაკუთრებული ეკონომიკური ზონის ჩამოყალიბება ფუძიენისა და კუანგტუნგის პროვინციებში. ეს ზონები მიზნად ისახავდა ინვესტიციების მოზიდვას უცხოური კომპანიებისათვის ბიზნესის საწარმოებლად უფრო მეტი თავისუფლებისა და გაცვლითი კურსის უპირატესობების შეთავაზების ხარჯზე. მოგვიანებით, 1985 წელს, შანხაისა და კუანგჭოუს სხვა ორ ქალაქთან ერთად საგარეო  ვაჭრობისათვის გახსნისა და 1988 წელს ხაინანის პროვინციის მთლიანად განსაკუთრებულ ეკონომიკურ ზონად გადაქცევის შემდეგ, უცხოურმა ინვესტიციებმა მნიშვნელოვანი ზრდა განიცადა და ცნობილმა კომპანიებმაც წამოიწყეს თავიანთი საქმიანობა ჩინეთში. ამ პროცესმა ხელი შეუწყო ჩინეთის ეკონომიკის გახსნილობას სხვა ქვეყნებისადმი.

სოფლის მეურნეობის მხრივაც მნიშვნელოვანი და ეფექტური რეფორმები გატარდა, რომელიც ანხუეის პროვინციის მოსახლეობის მცირე ჯგუფიდან დაიწყო, ხოლო მოგვიანებით მთელ ქვეყანაში გავრცელდა. ამიერიდან გლეხებს კოლექტივის მიწა გარკვეული პერიოდით შეეძლოთ “დაექირავებინათ” და  საკუთარი ნებისაებრ დაემუშავებინათ. მოსავლის გარკვეული ნაწილი გლეხს უნდა ჩაებარებინა კოლექტივისათვის, ხოლო დარჩენილი ნაწილი შეეძლო თვითონ განეკარგა (ან გაეყიდა ან თავად გამოეყენებინა). ამგვარმა თავისუფლებამ სტიმული მისცა გლეხებს  და მნიშვნელოვნად გაიზარდა სოფლის მეურნეობის ნაწარმის რაოდენობაც.

ტენგ სიაოფინგმა მოახერხა ისეთი ჩინეთისათვის ჩაეყარა საფუძველი, რომელსაც ყველა ქვეყნისაგან განსხვავებული, უნიკალური და საინტერესო ეკონომიკა აქვს. მისმა გაბედულმა გადაწყვეტილბებმა უდავოდ გავლენა მოახდინა ჩინეთის შემდგომ ეკონომიკურ პოლიტიკაზე.

[:]

კომენტარის დატოვება