ყოველწლიურად იმატებს ჩინური ენით დაინტერესებული ადამიანების რიცხვი საქართველოში და აგრეთვე იმ ადამიანების რაოდენობაც, რომელთაც სწავლის გაგრძელება და ჩინური ენის გაღრმავება სწორედ ჩინეთში სურთ. საქართველოს მოქალაქეებს კი ჩინეთში სწავლის შანსს ჩინეთის მთავრობა და კონფუცის ინსტიტუტი აძლევს.
ჩინეთის მთავრობის სტიპენდია გათვლილია, როგორც ერთ წლიანი ენის შემსწავლელი კურსის გავლის მსურველთათვის, ასევე მათთვის ვისაც ჩინეთში სურთ ბაკალავრიატზე, მაგისტრატურასა და დოქტორანტურზე სწავლა. აღნიშნული სტიპენდია სრულიად ფარავს სწავლისა და საცხოვრებელ ხარჯებს და აგრეთვე უზრუნველყოფს ყოველთვიურ სტიპენდიას. ჩინეთის მთავრობის სტიპენდიები ყოველწლიურად ზამთრისა და გაზაფხულის პერიოდში ცხადდება და კანდიდატების შერჩევაში საქართველოს განათლების, მეცნიერების, კულტურისა და სპორტის სამინისტრო და საქართველოში ჩინეთის სახალხო რესბუბლიკის საელჩოს წარმომადგენლები იღებენ მონაწილეობას. გარდა ამისა ბოლო რამდენიმე წელია საქართველოს მოქალაქეებისათვის ხელმისაწვდომი გახდა ჩინეთი-UNESCO-ს ერთობლივი სასტიპენდიო პროგრამა, რომელიც ძირითადად ჩინური ენის ერთწლიან პროგრამას მოიაზრებს. აღნიშნული სტიპენდიის ფარგლებში დაფინანსებულია სწავლის, საცხოვრებლისა და მგზავრობის ხარჯები, ამასთანავე უზრუნველყოფილია ყოველთვიური სტიპენდიაც.
ამასთან საყურადღებოა!
ჩინური ენის შემსწავლელთა რაოდენობის ზრდასთან ერთად კონკურენციამ საგრძნობლად მოიმატა, რის გამოც ბევრი სტუდენტი სტიპენდიის გარეშე დარჩა. წამსვლელთა სამართლიანი გადარჩევისთვის გამკაცრდა მოთხოვნები. ამჟამად, ჩინეთის სტიპენდიის მოსაპოვებლად საჭიროა ჩინური ენის ცოდნა მინიმუმ B2 დონეზე და ამის დამადასტურებელი საერთაშორისო სერტიფიკატი ჩინურ ენაში (HSK), ანუ სტიპენდიის მოსაპოვებლად საჭიროა მინ. HSK 4 სერტიფიკატის ქონა. ყურადღება მიექცევა გამოცდაში მიღებულ ქულებს, ასევე საქართველოში სტუდენტის აკადემიურ მოსწრებას.
ჩინეთის მთავრობის გარდა სტიპენდიებს ასევე გასცემს კონფუცის ინსტიტუტი, რომელიც ჩინური ენის შემსწავლელ ერთწლიან პროგრამას სთავაზობს დაინტერესებულ პირებს. აღნიშნული პროგრამაც სრულიად ფარავს სწავლისა და ცხოვრების ხარჯებს და სტუდენტებს ყოველთვიური სტიპენდიით უზრუნველყოფს.
აღსანიშნავია, რომ აღნიშნული სტიპენდიების ფარგლებში ძალიან ბევრ ქართველს საშუალება ეძლება მიიღონ უმაღლესი განათლება ჩინეთის უნივერსიტეტებში, აიმაღლონ კვალიფიკაცია და გაიუმჯობესონ ჩინური ენა. დღესდღეისობით ქართველ სტუდენტებს შეხვდებით ჩინეთის ისეთ უნივერსიტეტებში, როგორიცაა: პეკინის უნივერსიტეტი, ცინგხუას უნივერსიტეტი, ჭეძიანგის უნივერსიტეტი, ჟენმინის უნივრსიტეტი, ფუტანის უნივერსიტეტი და სხვა.
