[:ka]
საქართველოს უშუ სანდას ეროვნულმა ნაკრებმა მე-14 უშუს მსოფლიო ჩემპიონატზე მიიღო მონაწილეობა. ქალაქ ყაზანში, ნაკრების წევრმა მანუჩარ კვაშილავამ ბრინჯაოს მედლის მოპოვება შეძლო.
მანუჩარ კვაშილავა პირველი ქართველი სპორტსმენია, რომელმაც უფროსებში გამართულ მსოფლიო ჩემპიონატზე ჩინურ საბრძოლო ხელოვნებაში, უშუში მედალი მოიპოვა.
უშუ-სანდას ნაკრების წევრები ყაზანში გამართულ მსოფლიოს ჩემპიონატზე მწვრთნელების – ლაშა სუმბულაშვილისა და დავით კუჭავას ხელმძღვანელობით იმყოფებოდნენ.
“ეს იყო ყველაზე მნიშვნელოვანი შეჯიბრი უშუს სამყაროში. იმიტომ, რომ ეს იყო მსოფლიო ჩემპიონატი, რადგან უშუს სამყაროს ყველა წარმომადგენელი მიისწრაფვის იმისკენ, რომ ჩავიდეს მსოფლიო ჩემპიონატზე და მოიპოვოს მსოფლიო ჩემპიონის ტიტული.” განაცხადა ლაშა სუმბულაშვილმა.
უშუს მსოფლიო ჩემპიონატში 60 ქვეყნის 600ზე მეტი სპორტსმენი იღებდა მონაწილეობას. საქართველომ კონკურენცია გაუწია ისეთ დიდ ქვეყნებს როგორებიცაა: ჩინეთი, თურქეთი, ირანი და სხვა.
“სიმართლე გითხათ ძალიან დიდი იყო კონკურენცია. მოხდა ისე, რომ პირველი შეჯიბრიც მოვიგეთ, მეორეც და მოვხვდით ნახევარფინალში. ეს მართლაც უდიდესი მიღწევა იყო, როგორც მანუჩარისთვის ასევე ჩვენთვის, მთელი ფედერაციისა და მთელი საქართველოსთვის, ვინაიდან ეს არის მასშტაბური შეჯიბრი, რომელიც სამომავლოდ, რომ გაიმართება მსოფლიო თასი უშუში, იქ უკვე ლიცენზია გვაქვს, რომ მივიღოთ მასში მონაწილეობა.”- განაცხადა მწვრთნელმა.
საქართველოს უშუს ისტორიაში ეს პირველი მსოფლიო პრიზია. მანუჩარმა მსოფლიო ჩემპიონატზე 3 წლის წინაც მოიპოვა ბრინჯაოს პრიზი.
“დამეთანხმებით ჩვენსავით პატარა ქვეყნისთვის ეს დიდი მიღწევაა. როგორიცაა თურქეთი და სხვა დიდი ქვეყნები, მათ სრულიად უმედლოდ მოუწიათ წელს ასპარეზზე გამოსვლა, მიუხედავად იმისა, რომ ძალიან დიდი დაფინანსებები აქვთ მათ სპორტულ ფედერაციებს. მადლობა ღმერთს და ყველა იმ ადამიანს ვინც გვერდით გვედგა, მათ შორის სამინისტროს, თვითონ ფედერაციის გამგეობას, რომ დაგვეხმარა მიგვეღწია ამ შედეგისთვის.”- დასძინა მან.
სინომედიას მანუჩარ კვაშილავამ თავისი ემოციები გაუზიარა.
“პირველ რიგში ვულოცავ ჩემს თავს და მერე მთლიანად საქართველოს. მართალია ბრინჯაოს მედლით ჩამოვედი, თუმცა ჩემთვის ეს ოქროს ღრებულებისაა. საკუთარი თავის ყოველთვის მჯერა. როგორც ასე რაღაც-რაღაცეებში არ გამიმართლა. მაგ. დაწყვილებებში. ერთ – ერთი ყველაზე ძლიერი მეტოქე იყო ჩინელი და როდესაც უშუს ჩემპიონატზე მასთან გიწევს მეტოქეობა, პირველობის მოპოვება ძალზედ რთულია. გამიმართლა იმაში, რომ მოვიგე ორი ბრძოლა და გადავედი ნახევარფინალში.” – განაცხადა მან.
ის შეჯიბრის წინა სამზადისზეც გვესაუბრა და სამომავლო გეგმებიც გაგვიზიარა.
“რაც შეეხება წინა სამზადისს, ვვარჯიშობდით მაქსიმალურად. გვინდოდა შედეგის მოპოვება, ვინაიდან სახელმწიფო დებს ფულს რათა გაგიშვას საზღვარგარეთ სხვადასხვა ტურნირებზე და როდესაც მოლოდინს ამართლებ ამით კმაყოფილია ყველა. სამომავლოდ ვაპირებ უფრო მეტად ვიმუშაო, განვითარდე და გავააუმჯობესო ის შედეგი რაც წელს მივიღე.”– განაცხადა მანუჩარმა.
აღსანიშნავია, რომ მანუჩარ კვაშილავა, რომელიც ფიზიკური აღზრდისა და სპორტის სახელმწიფო უნივერსიტეტის სტუდენტია, უშუ-სანდაში 2014 წელს მსოფლიოს ახალგაზრდული ჩემპიონატის ბრინჯაოს პრიზიორიც გახდა.
[:]
