გაზაფხულის ფესტივალი, იგივე ჩინური ახალი წელი (ჩინ.: “春节” „ჩუნძიე“ ), ჩინელი ხალხისთვის წლის ყველაზე მნიშვნელოვანი დღესასწაულია. გაზაფხულის ფესტივალი ყოველ წელს სხვადასხვა დროს იმართება (როგორც წესი, 21 იანვრიდან 20 თებერვლის შუალედში) და ის დამოკიდებულია მთვარის კალენდარზე.
თუკი ჩინური ახალი წლისთვის ჩინეთში მოხვდებით, თვალს მოგჭრით ქუჩების უმშვენიერესი მორთულობა. ჩინელები ამ დღესასწაულისთვის სახლსაც განსაკუთრებულად რთავენ. სახლის დასუფთავება და მორთვა ჩინურ ახალ წლამდე 2 კვირით ადრე იწყება და მასში ჩართულია მთელი ოჯახი.
სახლის დალაგება-დასუფთავებით ჩინელები სიმბოლურად გასული წლის „მტვერს“ იშორებენ და ემზადებიან ახალი წლის იღბლის მისაღებად. მორთულობაში დომინირებს წითელი ფერი.
ჩინელი ხალხისთვის ეს დღესასწაული ოჯახის გაერთიანებასთან ასოცირდება. ფესტივალის დაწყებამდე და მისი დამთავრების შემდეგ მუდამ გადატვირთულია საქალაქთაშორისო ტრანსპორტი, – ყველა სახლში ბრუნდება, რათა უქმეები ოჯახთან ერთად გაატაროს.
ოჯახურ სადილზე მრავალი სახეობის კერძს ამზადებენ. თუმცა, მათ შორის ყველაზე ტრადიციული გახლავთ ძიაოწ’ (ე.წ. „პელმენები“) ჩრდილოეთში, ხოლო სამხრეთში – ნიენკაო (ბრინჯის ნამცხვარი).
გაზაფხულის ფესტივალთან დაკავშირებული მრავალი ტრადიცია არსებობს, ერთ-ერთი მათგანია „წითელი კონვერტების“, ე.წ. „ხუნგპაოების“ დარიგება, რომლებშიც ფული დევს. როგორც წესი, ამ კონვერტებს უფროსები აძლევენ ბავშვებსა და მოზარდებს. საინტერესოა, რომ ტექნოლოგიების განვითარებასთან ერთად ჩინელებმა თავიანთი ტრადიციების ტექნოლოგიებთან შერწყმაც შეძლეს და ბოლო პერიოდში „ხუნგპაოებს“ ერთ-ერთი ყველაზე პოპულარული სოციალური ქსელის („ვიჩატის“) მეშვეობით აგზავნიან.
