ჩინელი ხალხი ჯანმრთელობასა და ფიზიკურ აქტივობას დიდ ყურადღებას აქცევს. ჩინეთში ერთ-ერთი ყველაზე გავრცელებული ფიზიკური აქტივობა მოედნის ცეკვაა (广场舞 კუანგჩანგვუ), რომელიც, ძირითადად, შუახნის და ხანდაზმულ ადამიანებს შორის სარგებლობს პოპულარობით.
მოედნის ცეკვა, როგორც წესი, დილით ადრე ან საღამოს 6 საათის შემდეგ, სხვადასხვა მუსიკის თანხლებით სრულდება. ცეკვისათვის ჩინელები პარკებსა და სხვადასხვა მოედნებს ირჩევენ (მათ შორის, სავაჭრო ცენტრების წინ მიმდებარე ადგილებს).
ცეკვა მარტივი მოძრაობებისგან შედგება, თუმცა შეხვდებით დახვეწილ, პროფესიონალ მოცეკვავეებსაც. ჩვეულებისამებრ, თითოეულ ცეკვას ერთი ლიდერი ჰყავს (ეს შეიძლება იყოს ახალგაზრდა მოხალისე ან შუახნის/ხანდაზმული გამოცდილი მოცეკვავე). მოცეკვავეების ასაკი შეზღუდული არ არის, თუმცა, როგორც წესი, ცეკვაში მონაწილეობას შუახნის ან უკვე პენსიაზე გასული ადამიანები იღებენ. ამგვარად ისინი ინარჩუნებენ საზოგადოებრივ ცხოვრებას, ზრუნავენ საკუთარ ჯანმრთელობაზე და დადებითი ემოციებითაც იმუხტებიან.
