[:ka]
ჩინეთის მთავრობის გადაწყვეტილებით, გადასახადების ასაკრეფად და ელექტრონული ინვოისების გასაცემად ჩინეთი მომავალში Blockhain ტექნოლოგიას გამოიყენებს.
მსოფლიო კრიპტოვალუტების 60 პროცენტი ჩინეთში იწარმოება. ამ კუთხით ჩინეთი მსოფლიოს წამყვანი ქვეყანაა, თუმცა, მოსალოდნელია, რომ კონკურენცია ამ სფეროში გაიზრდება და სულ უფრო მეტი ქვეყანა მიიღებს ახალ ტექნოლოგიას. ქვეყნის ყველაზე დიდ კონკურენტად შეიძლება ამერიკის შეერთებული შტატები მივიჩნიოთ. არიზონელი კონგრესმენი დევიდ შვეიკერტი და დემოკრატი ჯარედ პოლისი ამზადებენ პროექტს სახელად “Blockchain Caucus”. პროექტის მთავარი მიზანი მოსახლეობაში ინფორმაციულობის გაზრდა, ტექნოლოგიის პოპულარიზაცია და სხვადასხვა სფეროში დანერგვა იქნება, მათ შორის, სახელმწიფო სტრუქტურებში. აშშ-ს გარდა, ბიტკოინი ლეგალურ და ოფიციალურ ვალუტად ცნეს იაპონიასა და სამხრეთ კორეაში.
ბიტკოინი პირველი დეცენტრალიზებული ციფრული ვალუტაა, რომელიც 2008 წელს შეიქმნა. მისი წარმოქმნა, შენახვა, დახარჯვა და შეძენა ხდება ელექტრონულად. ამისთვის საჭიროა არაერთი არსებული პლატფორმიდან რომელიმეზე, მაგალითად, Coinbase-ზე ბიტკოინის საფულის გახსნა, რომლის მართვა შესაძლებელია სმარტფონით, პერსონალური კომპიუტერით, პლანშეტით და ა.შ. ტრანზაქციის დადასტურებას მინიმუმ რამდენიმე წამი და მაქსიმუმ 90 წუთი შეიძლება დასჭირდეს, თუმცა საშუალო მაჩვენებელი 10 წუთია. იმის გამო, რომ ბიტკოინი დეცენტრალიზებული ვალუტაა, არავის შეუძლია ბიტკოინის ანგარიშის გაყინვა. ბიტკოინით ანგარიშსწორება უკვე დაშვებულია ისეთ ონლაინ-მაღაზიებში, როგორიცაა Amazon-ი, eBay, Zappos-ი.
[:]
